---

Blättern: < zu Text 3 – zu Text 5 >

ZUM GESAMTINHALT

Ungrisches Magazin, Band 1, Heft 1, Text 4 (S. 32-36 )
Hrsg. von Karl Gottlieb Windisch
Preßburg, Löwe, 1781
Autor: unbekannt
Zuordnung: Geschichte

(P32)

4. Gründtliche Beschreibung und eygendtlicher Bericht der Einbeleittung

vnd Copulation, sampt denen ansehentlichen Presenten. Deß Durchleuchtigen Hochgebornen Fürsten vnnd Herrn, Herrn Sigismundi Bathoris, Fürsten in Siebenbürgen Moldaw und Walachey der Zackeln** Grafen, etc. Mit der auch Durchleuchtigistin Hochgebornen Fürstin vnd Fräwlein, Fräwlein Maria Christierna*** geborne Ertz-

**Sekler.
***Eine Prinzeßinn Tochter des Erzherzogs Karl von Oesterreich, Herzogs von Steyermark, Kärnthen, und Krain. Sie war überaus schön, und redete die lateinische Sprache sehr gut.

(P33)

hertzogin zu Österreich, Hertzogin zu Burgundt, Steyer, Kärndten, Crain vnd Würtenberg, Gräuin zu Tyroll Görtz, Seiner geliebsten Braut vnd Gemahel. Gehalten vnd beschehen zu Weissenburg in Siebenbürgen, den ersten und sechsten Augusti, diß lauffenden Fünff vnd neuntzigist Jar,* etc.

Einbeleittung vnd Empfang der Fürstlichen Braut in Siebenbürgen.

Den ersten Augusti diß fünff und Neuntzigist Jar, Jst der Durchleuchtig Hochgeborne Fürst vnnd Herr, Herr Sigismundus Báthory deß heiligen Römischen Reichs Fürsten und Weyda in Siebenbürgen, Moldaw, vnd Walachey, etc. Seiner geliebten Braut, Fräwlein Maria Christierna, geborne Ertzhertzogin auß Oesterreich, etc. Deren geliebten Frawen Mutter, der auch Durchleuchtigistin Hochgebornen Fürstin vnd Frawen, Frawen Maria Herzogin in Ober vnnd Nider Bayrn, etc. auff ein halb Meil Wegs von der Stadt Weissenburg mehr als mit 2000. wol gebutzten Pferdten, die mit Gold, Silber vnd andern Geschmuck auff das herrlichiste geziert gewesen, entgegen geritten, alßbaldt sie aneinander angetroffen, nach beschehener Empfahung zu beyden Theiln abgesessen, vnnd vnder ein Gezehllt die allda mit Fleiß auffgericht, vnd auff das stattliches zubereit worden, sich verfügt. Nach diesem hat der Siebenbürgerische Hoff Cantzler, Herr Stephanus Jossica** eine herrliche Oration gehalten, welchem in Namen ihr Fürstl. Durchl. Herr Bischoff von Lauenthal, etc. so beyde Fürstin, als die Braut vnnd dero geliebten Fraw Mutter auß Steyer in Siebenbürgen begleitet, zierlichen geantwort vnnd hin widerumb Congratulirt hat. Nach vollendung dessen, hat sich die Fürstliche Braut, sampt deren geliebten Fraw Mutter auff den Wagen, so

*Nämlich im Jahre 1595.
**Josika.

(P34)

der Fürst in Siebenbürgen entgegen bracht, der vberauß kostlich geziert gewest, vnd darinnen acht gewaltiger schöner weißer Roß gezogen, sich begeben, und in Gottes Namen jhren weg auff Weissenburg genommen. Also ist auch der Fürst in Siebenbürgen der mit seinen Herrn vnnd Hoffgesind auffgesessen, vnd die Braut mit grossen Frewden hinein begleidet, die auch allda zu Weissenburg herrlich empfangen worden, vnd als sie her zu der Stadt genahend, die grossen Stuck in grosser Anzahl abgeschossen worden. Hierauff alle drey Fürstliche Personen, sich zu der grossen Kirchen gleich bey dem Schloß genahent, allda widerumb abgestanden, von ihr Bäpstlichen Heiligkeit Nuntio, so in seinem Bischöflichen Habitu ihrer bey der Thür gewartet, die Benediktion empfangen, darauff das Te Deum laudamus gefolget, nach diesem zu den grossen Altar fort geschritten vnnd jhr Gebett verrichtet, alßdann zu Fuß auß der Kirchen in das Schloß gangen. Daß sie von menigklichen gesehen, vnd mit grosser Frolockung deß Landvolks empfangen worden.

Hernach volgt die Copulation.

Den sechsten Tag diß Monats Augusti vngefährlichen vmb vier Vhr nach Mittag sind obbemelte Fürstliche Personen in die Kirchen gangen, Da der Herr Bischoff von Wardein,* als jhr Röm: Kay: May: etc. abgesandter die Fürstlich Braut auff der rechten, vnd Herr Tersfy jhr Kön. Würden in Polln Ertzhertzog Maximilian, etc. abgesandter auff der linken Handt begleitet, denen jhr Durchl: die Mutter vorgangen, die also in die Kirchen geführt worden, Jn welchen ein schöner Himmel auffgericht gewesen, vnter dem alle drey Fürstliche Personen kniend sind, jhr Gebett gethan. Alßdann ist jhr Fürstl: Durchl: als Preutigam zum Altar getretten, vnd

*Martin Pethe.

(P35)

hat der Bischof von Wardein, vnd Herr Terßfy gleichfalls jhr Fürstl: Durchl: die Braut hinzu geführt die beyde der Bäpstliche Nuntius zusammen gegeben, nachvolgends dessen, hat man die grossen Stuck lassen loß gehen, Jn die Trometten gestossen, vnnd bey mennigklichen grosse Frewd erweckt worden. Nach beschehenem Gottesdienst, Jst man in das Schloß gangen, in welchen auff einem Saal alles stattlichen vnd zierlich ist zubereit gewesen, vnnd sind an einer Daffel gesessen, die Fürstliche Braut jhr Durchl: dero Fraw Mutter, jhr Fürstl: Durchl: in Siebenbürgen selber, Der Bäpstlichen Heiligkeit Nuntius jhr Röm: Kay: May: etc. und jhr Königliche Würden zu Polln Maximilianen abgesandter, Dann sind eben in solchem Saal andere zwo Daffel geordnet gewesen. Da an der einen das Frawen Zimmer, die andere aber mit ansehentlichen Herrn, vnd Abgesandten, darbey auch Herr Bischoff von Lauenthal, vnnd der von Triest waren, besetzt gewest, alles auch Fürstlich vnnd prächtlich tractirt worden. Vnd ist von Jhr Fürstl: Durchl: mit jhr Durchl: der Braut nur ein Dantz beschehen, und weitter keiner, sonder die vbrige Zeit mit höflichen Gespräch, von den Herrn vnd Frawen Zimmer zugebracht worden. Deß andern Tags hernach der da war der 7. Augusti, ist man widerumb in die Kirchen gangen, vngefährlichen zwischen 9. und 10. Uhr, da dann der Bäpstliche Nuntius das Ampt gehalten, vnnd hat jhr Fürstl: Durchl: in Siebenbürgen, sowohl jhr Durchl: die Braut demselben mit grosser Andacht bey gewohnet, das gebräuchig Opffer vollbracht, vnd dem Bäpstlichen Legat jedes einen Ring geopffert, vnd nach beschehener Benediction das Mittagmal in der Camer eingenommen, Auff den abendt aber in voriger Ordnung das Nachtmal auff dem Saal gessen, da dann in aller beysein jhr Fürstlich Durch: in Siebenbürgen mit jrer Durchl: der Braut widerumb nur einen Dantz vollbracht haben.

(P36)

Eben desselbigen Tags sind die Fürstlichen Verehrung, vnd der ander abgesandten fürnemmen Landt Herrn, Städten vnnd Flecken present vberantwort worden, darunder jhr Fürstlich Durchl: Verehrung, vber 100,000 Gulden werth geschätzt wirdt, von Schüsseln, Teller vnd andern so zu einer Silber Camer vonnötten, so undter disen begriffen auff das herrlichste zubereit, vnnd ist jhr Fürstl: Durchl: der Braut die Graffschaft Fogroß* zu einem Heyratgut deputirt und verschriben worden, Sonsten haben sich vnder den Presenten vber die 109. Stuck von schönen und ansehntlichen Credentzen, die auf einen hochen werd geschätzt werden befunden. Der Allmechtig ewig Barmhertzig vnd gütig Gott, wölle disen zweyen Fürstlichen Personen sein segen, vnd benedeyung verleyhen, Glück, Heyl vnnd vberwindung wider den Erbfeindt Christlichen Namens mittheilen, damit sein Ehr vnd Glori gepreiset die Christenheit erweidert, vnd derselben Frid vnd Einigkeit gemehrt werde, Amen.

*Fogaras.